وجّهت الإعلامية ياسمين عز، خلال مقدمة برنامجها "كلام الناس"، عبر شاشة "mbc"، نصيحة الى الفتيات المقبلات على الزواج بالأخذ بنموذج زواج الفنانَين أحمد حلمي ومنى زكي والابتعاد عن الحديث السلبي عن الزواج.
وقالت ياسمين: "منى زكي وأحمد حلمي نقول الله أكبر عليهم ربنا يديم عليهم السعادة والمودة، بقالهم 22 سنة متجوزين وهما شباب وصغيرين مش جيل كبير 70 سنة، أكيد عينك واللي تحب تشوفه لو عايز تشوفه نموذج حلو هتشوف أحمد حلمي ومنى زكي، منى لما بتتكلم عن حلمي بتحس إنه شريك روحها، وهو لما بيتكلم عليها بتشوف كل الدعم والفخر في عينه، وقد إيه فرحان بنجاحها، نموذج موجود ولكن مش دايماً بيكون مشاهير وبيطلعوا للجمهور".
وأضافت: "الناس تشوف نموذج جميل زي أحمد حلمي ومنى زكي، يقول الله بيدعم مراته ومش أي حد بيدعم نجاح مراته، ومنى زكي بتهدي له نجاحها، اللي تتفرج على نموذج زي ده يجيلها عريس حلو وتتجوز جوازة حلوة".
واختتمت ياسمين عز بالقول: "متشفوش الأخبار، متتفرجوش على حاجة نكد، والأغاني خطيرة واللي بيسمع أغنية وبيردد كلامها الوحش بتحصله، خلي بالكم بتسمعوا إيه وبتغنّوا وبتشوفوا إيه، أنا لما بشوف مسلسل فيه حزن وقهر مبتفرجش عليه حتى لو قالوا لي إنه مكسّر الدنيا، بتفرج على الكوميدي والرومانسي إحنا مش ناقصين جراح... الأغاني الرومانسية تخليكي مرغوبة ومحبوبة وبتمشي وراكي بالمشوار، اسمعي حاجات حب، لكن الحزن والمرار لأ يا أستاذة ده هيجبلك تعب في حياتك، والنبي قال تفاءلوا بالخير تجدوه".