عاد الفنان المصري ياسر فرج للظهور الإعلامي من جديد، بعد غيابٍ دام خمس سنوات، ليكشف في حوار مؤثر عن تفاصيل السنوات الأصعب في حياته، حين واجه مرض زوجته بالسرطان، ثم وفاتها، وما تبع ذلك من تجربة إنسانية قاسية غيّرت نظرته للحياة والفن.
ياسر فرج يكشف تفاصيل عودته لزوجته بعد 3 سنوات من الطلاق
ظهر ياسر فرج عبر برنامج "واحد من الناس" الذي يقدّمه الإعلامي عمرو الليثي على شاشة قناة "الحياة" للمرة الأولى منذ وفاة زوجته، كاشفاً تفاصيل اللحظات التي رافقت معرفته بخبر إصابتها بالمرض، قائلاً: كنت وقتها في الخارج، ولما عرفت أنّها أصيبت بالسرطان رجعت فوراً إلى مصر. رغم أنّنا كنا منفصلين وقتها، لكن رجعنا لبعض بشكل طبيعي؛ لأنها أم أولادي وكان لازم أكون جنبها وأسندها.
ياسر فرج يروي تفاصيل رحلة علاج زوجته
واستعاد فرج تلك المرحلة الصعبة قائلاً: كانت مصابة بسرطان في النخاع الشوكي، وكان عمرها 38 سنة فقط. بدأنا رحلة علاج طويلة جداً، والمرض كان عنيفاً ومناعتها ضعيفة، والأسوأ أنّ كل هذا كان وقت كورونا، فمكانش ينفع حد يقرب منها لأن أي عدوى كانت خطر على حياتها.
وأضاف: ربنا إداني قوة ماعرفش جات منين، كنت بحاول أكون قوي قدامها وقدام أولادي، لأني لو انهارت، هما كمان كانوا هيضيعوا. كنت بعمل كل حاجة في البيت، وبقف جنبها لآخر لحظة، ورغم الألم كنا دايمًا عندنا أمل إن ربنا هيشفيها.
ياسر فرج يكشف كلمات زوجته الأخيره له قبل وفاتها
استعاد ياسر فرج ما وصفه بأنه الجملة التي لن تغيب عن ذاكرته قائلاً: قالتلي: إنت حببتني في الكانسر.. الكلمة دي كسرتني، لكنها كانت شهادة منها إنها حست قد إيه كنت معاها بصدق. قبل ما تمشي قالتلي خلي بالك من الأولاد ومن أمي، وقالتلي أنا مسامحاك، وأنا كمان سامحتها، وكنت عايز أقولها حاجات كتير، لكن الوقت خلص، وكانت دي إرادة ربنا.
بعد رحيلها، عاش فرج صدمة قاسية، لكنه اختار أن يكون قويّاً من أجل أبنائه، موضحاً: مكنتش عايز أولادي يحسّوا إنهم فقدوا أمهم. كنت بخاف الناس تبصلهم بشفقة، فكنت بحاول أملأ الفراغ ونفتكرها بحب مش بحزن، علشان تفضل صورتها الجميلة جوانا.
ياسر فرج يتحدث عن خذلان الوسط الفني له في أزمته
وكشف فرج عن شعوره بالخذلان من الوسط الفني قائلاً: للأسف مفيش حد من زمايلي كلّمني وقت الأزمة، لا أثناء مرضها ولا بعد وفاتها، وده وجعني جدًا لأن في ناس كنت فاكرهم إخوات. اللي حصل خلاني أعيد حساباتي وقررت أبعد عن الوسط، كنت محتاج أعيش لأولادي مش لنفسي. وأشار إلى أنه واجه أزمات مالية كبيرة خلال فترة العلاج، مبيناً: النفقات كانت ضخمة جداً، لكن ربنا سترني. اشتغلت في حاجات بسيطة، وبعد كده أسست شركة إعلانات علشان أقدر أعيش وأكون قريب من أولادي.
ياسر فرج: كل وجع له معنى
عن حياته الشخصية بعد الفقد، قال فرج إنه لم يكن مستعداً للزواج في البداية: الناس قالولي اتجوز علشان أولادك، لكن كنت خايف عليهم، خصوصًا عندي بنتين وولد، وخفت يتعبوا مع زوجة جديدة. بعد فترة ربنا كرمني بسيدة محترمة، واتجوزنا، لكن الانفصال حصل بعد سنة واحدة، ومن وقتها ما فكرتش أتجوز تاني، أولادي هم حياتي.
وفي ختام اللقاء، فاجأ الإعلامي عمرو الليثي الفنان بمداخلة مؤثرة من أبنائه الذين وجّهوا له رسالة شكر على حبه وتضحياته. ليختم فرج حديثه قائلاً:الحياة علمتني إن كل وجع له معنى، وإن ربنا بيختبرنا مش علشان يعذبنا، لكن علشان يقوينا. أنا راضي بكل اللي حصل، لأنها كانت ست عظيمة، وربنا يعوضها بالجنة.