هاجمت الفنانة المصرية سمية الخشاب برنامج "رامز جاب من الآخر" من جديد، مشيرةً إلى أن المونتاج اجتزأ الكثير من اللقطات التي أظهرت حجم إصابتها البالغة التي تحدّثت عنها بالتفصيل، وعن الإجرءات القانونية التي اتخذتها في حق رامز وبرنامجه.
مشاهد محذوفة
وتحدّثت سمية الخشاب عن المشاهد المحذوفة من حلقتها مع أيتن عامر، وقالت "هما قصوا كتير جداً ليا وأنا بقول رجلي بتوجعني وكتفي وجعني، ولحظة وقعتي كانت وقعة قوية بس هو قص كتير عشان ميبانش إن أنا اتصابت.. وأنا عندي تمزق في الأربطة في رجلي في كتفي ومش بعرف أحرك إيدي بارتياح".
كشفت علمها بمقلب رامز في المواسم الماضية
وأكدت الفنانة المصرية، لدى مداخلة هاتفية في برنامج "تفاعلكم"، أنها على الرغم من إصابتها فإنها استمرت في تصوير باقي مشاهد مسلسلها "بـ100 راجل" رغم تعرّضها لتمزق في الأربطة في القدم والكتف، وإنها قامت بإزالة الجبس لتتمكن من التصوير.
وأضافت سمية الخشاب: "اللي يزعل ان ولا حد منهم كجهة انتاجية اتصل بالناس وقال سلامتكم أو أسف. هو احنا في غابة يا جماعة؟ مش مهم الناس يحصلها ايه المهم أطلع أنور وأعمل مشاهدات عالية؟ المهم مصلحتي والباقي يتحرق؟ ايه اللي بيحصل دة دة مهزلة لا يمكن السكوت عليها، الناس تتؤذي في صحتها. ما أنا عملتها معاه 4 سنين قبل كدة بس كنت عارفة إيه اللي بيحصل لكن المرة دي متقالش، عشان في تعمد للأذية يبقى انت كدة متعمد تؤذي الناس، دي جريمة يعاقب عليها القانون. قالي إنه برنامج عادي فورمات".
وأوضحت سمية أن هناك العديد من الضيوف المصابين في البرنامج، إذ قالت: "متأكدة ان في تعمد في الأذية والدليل إن مفيش حد اهتم إنني اتصابت، ولما رحت للمستشفى قالولي انت مش أول حالة، امبارح جالنا 3 حالات من عند رامز. أقل حد اتصاب حصله كدمات متعددة في جسمه. معقول انتوا عارفين بتكسروا في الناس كل يوم ومكملين تصوير؟ وقال أصل الناس ماضية على إنهم موافقين على جميع الملابسات والظروف الخاصة بالبرنامج. يعني ايه؟ أنا موافقة إنني اتكسر؟ أصلاً مفيش عقد بيننا بس لو حتى فيه عقد، جسمنا ده مش ملكنا، ده ملك ربنا، فمش من حقك تؤذي جسمي صحياً ونفسياً وعصبياً، ده ضد حقوق الانسان وضد القانون".
وشرحت سمية سبب نشرها صورة من البرنامج يوم عرض الحلقة: "الصورة اللي نزلتها كتبت عليها مش هسيب حقي منك يا رامز".
وتابعت سمية الخشاب: "ساعة ما بتقعي مش بتحسي قوي بالوجع. لكن بعدها حسيت بالوجع وكنت بعرج. رجلي الشمال مكنتش عارفة أدوس عليها. مبتلحقيش تاخدي نفسك في البرنامج. كله مفاجآت وانت مش مستوعبة اللي حصلك. بعد ما خلص البرنامج قلتلهم رجلي وارمة وبعرج ومسنودة على صديقتي، رجعت الفندق قلتلهم ودوني المستشفى، قالولي لا اصل مفيش حد. رحت المستشفى تاني يوم الصبح وعندي تقارير طبية مختومة وعندي كدمات متعددة وتمزق في الأربطة وكوارث. لسة متعالجتش. أنا قعدت 10 أيام عشان أقدر أنزل وشلت الجبس عشان أرجع التصوير. وبدوس على رجلي لحد اللحظة دي إن رجلي ما زالت وارمة. ليه ما زالت وارمة؟ عشان متعالجتش. لو هتعالج هحط جبس ومش هعرف أصور المسلسل والمنتج هيروح في داهية".
معظم الضيوف تعرّضوا لإصابات
وأنهت سمية الخشاب حديثها قائلة: "أنا رفعت قضية فعلاً ومن تاني يوم وأنا عاملة إجراء وفي طلب للنائب العام إن ينظر للموضوع. أنا متأكدة إن في ناس اتصابت ومش عايزين يقولوا عشان خايفين MBC تزعل منهم بس هي قناة محترمة وهي بتعرض البرنامج ومش الجهة المنتجة له. انا يعني صحتي دي محدش هيزعل عليها؟ كله إلا الأذية".
يمكنكم نشر مقتطفات من المقال الحاضر، ما حده الاقصى 25% من مجموع المقال، شرط: ذكر اسم المؤلف والناشر ووضع رابط Hawacom TV (URL) الإلكتروني الذي يحيل الى مكان مصدر المقال، تحت طائلة تطبيق أحكام قانون حماية الملكية الفكرية