سوسن بدر: "لا أرغب في إزالة ملامح السنين من وجهي"

قالت الفنانة القديرة سوسن بدر إنها لا ترغب في إزالة أو تغيير ملامح السنين من وجهها وأنها سعيدة بذلك.

وتابعت سوسن بدر خلال لقاءها عبر برنامج كلمة أخيرة الذي تقدمه الإعلامية لميس الحديدي على شاشة ON: "أنا خلاص كنت صغيرة وما صدقت خلصت الفترة دي ومبسوطة أوي بالمرحلة الحالية لأننا كبرنا وفهمنا وعقلنا وبقينا متقلبين الحياة والدنيا، واللي عايز يتجوز يتجوز واللي عايز يعمل حاجة يعملها مادام مش ضد العرف ولا الأخلاق ولا المجتمع أو الدين، ماعيب إلا العيب".

وأضافت سوسن بدر: "الناس مش هتبطل كده كده، وأنا صغيرة كنت بخاف للغاية من المجتمع وكنت حريصة جدا بقدر الأمكان أن أظل محافظة على التقاليد والأعراف حتى لو مش مقتنعة بها علشان أهلي وأبويا والمجتمع ولادي لكن مع الوقت عرفت أن التقدم في العمر والسن حرية وبراح وساعتها بنسأل.. ليه كنا بنعمل كل ده؟ لايصح إلا الصحيح محدش هيفضل طول الوقت عاجب كل الناس ولا كل الناس هتتفق عليه ".

وعن أهم مامنحه لها التقدم في السن قالت: "خبرة ونضج وحرية وبراج وسعادة وكل حاجة أنا في منتهي السعادة.. حتى ملامحي بحبها طلعلي خطوط وماله قمر برضه".

ووجهت رساله للسيدات اللاتي يخشين من خطوط وتجاعيد التقدم في السن.. والانتقادات التي يوجهها بعض الرجال للسيدات قائلة: "يعني الست بتكبر لوحدها وهو مش بيكبر؟ ماكلنا بنكبر سوا والمفروض نعقل سوا ونضج سوا الفرق ان الست بتنضج من سن اصغر اسرع من رالجل بيكون وقتها لسه بيلعب كورة في الشارع ".

وأضافت: "مش عاوزة الستات لما يكبروا يخافوا أو يعتقدوا أن فيهم حاجة نقصت بالعكس ربنا رحيم لو فيه حاجه بتقل او تختلف ده يزدنا فهم وثقة ونضج وعلم".