حرص الفنان المصري تامر حسني على توجيه رسالة مؤثرة لكل الأمهات بمناسبة عيد الأم عبر حسابه على منصة التواصل الاجتماعي "إنستغرام"، كما أوصى الشبان بهن.
وكتب تامر حسني عبر حسابه قائلاً: "الأم تستحق مننا إننا نفرحها ونكرمها في كل يوم مش بس النهاردة، وبمناسبة يوم عيد الأم إنه النهاردة... كل سنة وكل أم طيبة، وكل أم مش معانا ربنا يرفع من درجاتها ويوصلها كل خير دعواتنا".
كما وجّه رسالة خاصة للشبان وأوصاهم بأمهاتهم قائلاً: "يلا يا شباب، محدش ينسى يكلم والدته يقولها أحلى كلام، واللي يقدر يجيب وردة ويديها لها هتبقى على قلبها زي العسل، واللي مزعل والدته يجري يصالحها".
وأضاف: "دول اللي حرموا نفسهم في الدنيا عشان إحنا نعيشها، متنسوش هما دلوقتي مستنيين مننا كلمة حلوة تفرحهم وتهون عليهم".
من جانبها، احتفلت تاليا حسني، ابنة الفنانة بسمة بوسيل والفنان تامر حسني، بعيد الأم على طريقتها الخاصة، فقد نشرت عبر خاصية الـ"ستوري" من خلال حسابها على "إنستغرام" صورًا تجمعها بوالدتها، وأرفقتها برسالة حب بسيطة قائلة: "عيد أم سعيد وأحبك إلى الأبد".
بدوره، السيناريست والمؤلف أيمن بهجت قمر، اختار أن يحتفل بعيد الأم بطريقة مختلفة، إذ شارك جمهوره عبر حسابه على منصة "فيسبوك" موقفًا طريفًا من مراهقته مع والدته، وقال: "أنا عندي 17 سنة، كنت لسه ناقل جديد لوحدي وأمي متغاظة علشان ماعدتش عايش معاها، وكنت سايب عندها التليفزيون بتاعي. أخدت أصحابي عشان آخده، ووقفتهم بره عشان لو جوزها اتدخل. دخلت أعمل فيها راجل وأجعر بصوتي التخين: أنا عايز التليفزيون بتاعي… فوجئت بقفزة بطل اوليمبي واخدت احن "روسيّة" من ماما حبيبتي، وبصراحة استاهل".
وأضاف: "جوزها الله يرحمه صعبت عليه وهو اللي أداني التليفزيون، مش عايز أقول لكم منظري وأنا خارج بالتليفزيون كان عامل إزاي".
واختتم رسالته لوالدته قائلاً: "كل سنة وأنتِ طيبة يا ماما، طول عمرك صغنونة بس عصب... ربنا يخليكي لينا، تعبتي جامد معانا واستحملتي كتير".